SONG, 26 Okt: Tiga buah sekula sekondari di pelilih Song mujur nyapai peratus patut nerima setipikit ngelui peratus nengeri iya nya 93.15% enggau rengat nasional (93.50%).
Kaban Kunsil Nengeri (ADUN) Katibas, Lidam Assan nengah laman facebook iya madahka, SMK Song nyapai 96.55%, SMK Katibas 97.50% enggau SMK Song 2 94.32%.
Iya mega bisi dipadahka pasal peratus patut nerima setipikit renggat nengeri enggau nasional mujur dijapai tujuh taun bejurut.
“Nengah awak tu aku meri pengaga ati ngagai semua pengajar di pelilih Song,” ku iya rambau Pengerami Anugerah Servis Nyulut enggau Pengajar SPM Renggat Opis Pelajar Pelilih Song 2024.
Berebak enggau nya, iya meri pengaga ngagai SMK Song laban ulih nyapai gred pukul rata sekula ngelui ari tikas nengeri, (4.92) enggau tikas nasional (4.74) dalam peresa Sijil Pelajaran Malaysia 2023, taun siti nyin suba.
Iya ngarapka, penyulut nya tadi diteruska ngambika bala nembiak ransing belajar sereta semua pengelelak, pengeransing sida nyengkaum bala pengajar ninting hari meri asil ke manah.
Tandu iya, semua pengajar mega aset ti berega ngagai sekula enggau komuniti lokal di pelilih Song.
Pemendar enggau pengepuh sida ngajar enggau ngembing nembiak sekula endang patut dipuji.
Sebedau tu iya madahka, perayat lebih agi nembiak sekula ba menua ulu enggau menua pesisir diperansang ngemujurka diri ba pekara pelajar nyengkaum nemu pasal pelasar ti benung dikemeratka perintah Sarawak kemaya hari tu.-TVS
