MIRI, 20 Ogos – Sesiku orang ti deka minta pemendar permit mindah meraka pelilih ba miri mesti bisi dokumen udah nerima dua dos vaksin, permit polis enggau surat ari pengaji.
Komiti Mutarka Pemusah Ngenyit Bagi Menua Miri (JPBBM) madahka, enti sema bisi penusah ngenyit ke nyadi, penetap dua dos vaksin enda dipinta.
Penusah ngenyit nya tadi nyerangkung pemati ti ngaul diri sebilik ke semak enggau ketegal deka berubat.
“Beduduk ari nya, mensia mayuh ke deka minta permit mindah meraka pelilih (Miri, Subis, Marudi, Beluru enggau Telang Usan) ba dalam pelilih Miri mesti ngasika penetap ke udah ditetapka JPBB Miri,” ku komiti nya madah ba dalam siti penerang.
JPBBM madahka pekara nya sepengudah abis aum ti dichairmanka Menteri ke megai tanggungpengawa ba dalam komiti nya, Datuk Lee Kim Shin.
Permit nya dipinta ungkup peranak ke bisi nurun berubat ke fasiliti pengerai, betuchuk vaksin, servis ke diguna, pengawa berat tauka ngabas diri sebilik ke bisi penusah.
Nangkan ke nya, peranak mega dikemendarka pulai bekebun tauka ngemataka jelu tupi tang mesti nerima pemendar ari opis betanam betupi ti nguna permit.
“Pemutus tu dipejalaika dikena nentuka pelilih Miri seruran bejejaga sereta beratika gaya kemaya hari tu kelimpah ari bebendar nagang pengekai igi penyakit COVID-19,” ku iya madah agi.
Kelimpah ari nya, permit dipinta ungkup peranak ke mendam di menua ulu ke deka nurun meli bekal pemakai ba Miri lalu penyampau pasinjir ti dikemendarka iya nya nitihka kapasiti perengka pengangkut ke ditepan.
Ejensi penerit atur enda ngemendarka permit mindah meraka pelilih ke deka ngulu pengerami rama ti nyengkaum ngasu ba kampung tauka program belangkau ba luar.
TVS bisi ba Telegram, Facebook, Twitter, Instagram, TikTok enggau YouTube.
