OPIS Menteri Pengawa Dagang Dalam Menua enggau Pekara Bebelika Barang (KPDNHEP) meransang raban pedagang nyual minyak makai sawit tulin butul ba rega ke baruh ari rega maksimum ke udah ditetapka.
Sapit Direktor Penerit Atur (Operasyen) Seksyen Penerit Atur KPDNHEP Shamsul Nizam Khalil madahka, rega runchit maksimum minyak makai sawit tulin dibungkus dalam butul 1 kilogram (kg), 2 kg, 3 kg dan 5 kg udah diteritka ba baruh Perintah Nyaga rega enggau Antipencatutan (Penentu Rega Maksimum Minyak Makai) 2021 ba pun 1 Ogos ke udah.
Rega runchit maksimum minyak makai tulin dibungkus butul ditetapka iya nya ba rega RM6.70 (1 kg), RM12.70 (2 kg), RM18.70 (3 kg) enggau RM29.70 (5 kg).
“Tu enda nagang sekeda pedagang nyual ba rega ke lebih baruh ari rega ke ditetapka sepemanjai pengawa neritka rega maksimum runchit minyak makai sawit tulin butul dipejalaika,” ku KPDNHEP madah nengah siti penerang maya hari lima.
Beduduk ari nya, iya madahka, asil peresa enggau patau maya 1 nyentuk ke 18 Ogos di 8,885 premis runchit ba serata menua tetemuka bisi 7,779 premis ngasika minyak makai sawit tulin butul ba rega maksimum ti udah ditetapka, seraya 1,082 premis nyual ba rega ke lebih baruh enggau 24 premis dikompaun ketegal penyalah nyual ngelui ari rega maksimum.
TVS bisi ba Telegram, Facebook, Twitter, Instagram, TikTok enggau YouTube.
