KUCHING: Tu meh maya ti engkeman alai Kaban Parlimen ari Sarawak enggau Sabah tau mangku pengawa Sapit Menteri Besai Menua Malaysia.
Penemu nya dipansutka Kaban Kunsil Nengeri (ADUN) N15 Asajaya, Datuk Abdul Karim Rahman Hamzah, nengah laman Facebook iya ti nyemetak madahka bala ketuai ari Sarawak enggau Sabah diatu patut dichiri nyadi Sapit Menteri Besai.
Iya besetuju enti sema penuduk Sapit Menteri Besai diberi ngagai Kaban Parlimen ari Sabah enggau Sarawak laban kedua-dua nengeri tu udah mantu mai pemansang ngagai menua Malaysia ari mayuh macham sukut.
Sarawak enggau Sabah udah nyadi dua bengkah nengeri ti nyadi pun penatai ekonomi ti pemadu besai ba Malaysia sereta udah nentuka menua kitai seruran tegap.
Ba awak ti sama, iya ngelalau rayat ngambika sabar nganti pemutus rasmi ari Yang di-Pertuan Agong bekaul enggau sapa ketuai ke deka dichiri nyadi Menteri Besai.
Mensia mayuh dilalau bebasaka pemutus ti deka dipansutka Yang di-Pertuan Agong sereta anang ngaga spekulasi bekaul enggau pekara tu.
Senentang penyarut politik ba renggat perintah menua besai, Abdul Karim madahka perintah besai patut ngemeratka semua rayat, sekalika orang nya ari parti penyakal tauka sapa-sapa aja.
Semua orang politik mesti ngembuan ulah ti rasional sereta tegap ngambika menua Malaysia ulih diatur enggau naka pemanah.
Ku iya madah agi, raban perintah enggau raban penyakal patut sama bela gawa enggau pangan diri sereta besaup ngemunaska pengelekai igi penyakit COVID-19 ti benung nuntung menua diatu.
Kebuah pia, ku iya, laban penyarut politik ulih nekul pemansang enggau ekonomi menua.
TVS bisi ba Telegram, Facebook, Twitter, Instagram, TikTok enggau YouTube.
