KUCHING, 19 Okt: Pemanah jaku nasional tauka jaku Melayu ulih diangkat ke renggat antarabansa sekalika nyadi jaku dikena berandau enggau nulis.
Sapit Speaker Kunsil Nengeri Sarawak, Dato Idris Buang madahka, Jaku Melayu ti suah dikena bejaku ninting hari di menua tu ngayanka komuniti enggau penyiru rayat pupu bansa ke mendam di menua tu.
Ku iya madah, karya ti dibantaika sekeda penulis lokal ke ngena jaku Melayu mega ulih nusui tauka nyeritaka pasal latar belakang pengidup sesebengkah etnik di Bumi Kenyalang.
“Menua Malaysia ulih didaja ke serata dunya nengah jaku kitai enggau mandangka identiti kitai, bansa enggau ulah mereti, budaya sereta prinsip pengidup.
“Pekara ke ditusui mayuh amat. Kitai udah meda tadi anugerah ke diberi ngagai penulis mayuh mantaika cherita ti bekaul enggau pengidup sesebengkah etnik ti bisi di Sarawak. Aku meri pengaga ngagai semua penulis sereta penengkebang,” ku iya.
Iya mansutka jaku nya rambau Anugerah Tinta Kenyalang ba Dewan Santapan, Kunsil Nengeri ditu, kemari.
Ba baruh Bajet 2025, perintah madani udah ngungkupka penyampau RM50 juta ngagai Dewan Bahasa dan Pustaka (DBP) ngambika bekerejasama enggau pemekuh jaku dikena mantu negapka agi aktiviti jaku sereta litaricha, tebal agi ngaul rebak biak.
Nya nyerangkung nyalin jaku ari sekeda karya, ngatur teater sereta nyaga pemisi jaku bansa minoriti bukai baka jaku etnik siam.-TVS
