LIMBANG, 14 Okt: Malaysia enggau Brunei Darussalam ngembuan kaul ti rat ukai semina ari sukut diplomatikk tang mega kaul diri sebilik ti udah ditempa kenyau ari kelia.
Kaban Parlimen Limbang, Datuk Hasbi Habibollah nerangka kaul entara kededua menua nya baka isi enggau kukut ti ditegapka agi nengah kerejasama dalam mayuh macham bidang kelimpah ari penemuai rasmi.
Hasbi ke mega Sapit Menteri Perengka Pengangkut nerangka, laban nyadi menua ke berimbai, perintah chukup meransang semua gerempung, gerempung ukai dikuasa pemerintah (NGO) sereta ba renggat ejensi perintah enggau peribit sama bejalaika program sechara begulai.
“Kaul entara menua Brunei enggau Malaysia, kelebih agi kitai di Sarawak enggau di utara Sarawak, baka kukut enggau isi, sida ari sukut diri sebilik di Brunei enggau di Limbang,” ku iya.
Iya madah munyi nya lebuh bejaku beserimbai Pengerami Makai Lemai Pengakap Sarawak enggau Gerempung Pengakap Brunei diatur ba Palan Pemansang Komuniti Melayu Limbang malam ensana.
Tandu iya,, nembiak rebak baru patut begulai dikena ngenegapka kaul ti rat entara kededua menua ngagai tikas ke tinggi.
Nangakn ke nya, iya mega nerima kerejasama entara pengakap Sarawak enggau pengakap Brunei ti ngatur program enggau penemuai ke Limbang ti nyadi chara dikena ngenegapka kerejasama enggau kaul entara kededua menua nya.-TVS
