KUCHING, 13 Okt: Penanyi tebilang menua Indonesia, Judika madah diri agi deka datai merindang taun baru ba panggau Borneo Sonic Music Festival (BSMF).
Ku iya, pekara nya beduduk ari sukung ke chukup manah ari mensia mayuh ke bela sampal nedat Stadium Sarawak ba hari kedua festival muzik nya.
Judika madahka, pengerichah enggau pengangit mensia mayuh ke datai kia meda iya belagu nyadi peransang ngagai iya arapka diri agi dikangau merindang ba BSMF taun baru.
Malam tadi, Judika nyadaka sekeda lagu tebilang baka ‘Bukan Rayuan Gombal, Sampai Kau Jadi Milikku, Tak Mungkin Bersama, Mapala, sereta mayuh agi ke bukai.
Kelimpah ari nya, Judika mega bisi nyadaka lagu tebilang ari iya empu ke diberi nama, ‘Baik-baik saja, ke nerima panjung ari bala perindu ke datai meda konsert nya.
BSMF serak tu dirichahka enggau pemerindang ari artis lokal iya nya Thomas Kok ti merindang enggau lagu ‘Silence’ ari Jay Chou.
Kelimpah ari Thomas, artis lokal ke bukai bisi sama merindang ti ngaul Namewee enggau Priscilla Abby.
Panggau BSMF mega dirichahka enggau artis antarabansa ke bukai baka 4eve ari Thailand, Junny, Yeon Seobin enggau DJ Ujoo (Korea Selatan) kelimpah artis tebilang ari Indonesia, Bunga Citra Lestari.-TVS
