SARATOK, 10 Okt: Siku-siku orang ke nyadi penanyi mesti mandangka ulah ke manah sekali nya nengah atur milih leka lagu enggau ke bukai laban sida chukup mudah nyadi chunto lebih agi ngagai bala peminat enggau orang luar.
Ku siku penanyi Iban, Lucy M iya empu senaka ulih nyaga ulah diri kelimpah nyeliah diri negu isu-isu ke sensitif ba genap lagu ke disada lalu nya ngujungka iya mengkang dikerinduka bala peminat nyentuk ke sehari tu.
“Kelimpah ari bakat nyadi sesiku penanyi patut meri chunto ke manah ngagai bala peminat enggau orang luar.
“Enti agi segi milih lagu mesti engkeman enggau vokal kitai tauka lagu ulih nangkup peminta netizen tauka bala peminat.
“Nuju peninga ba luar din, enti maya nempa sesebengkah lagu selalu iya aku deka ngemeratka pekara enda negu sensitiviti bansa tauka pekara bukai ti ulih ngundang jaku pejah ke enda manah ngagai diri empu,” ku iya.
Lucy M mansutka jaku timbal nya maya datai merindang ba Pesta Saratok 2024 di Panggau Besai Sri Kalaka, Hari Dua tu tadi.
Nangkan ke nya ku iya, pemujur bulih Anugerah ‘Borneo Art And Creative Award’ (BACA) 2024 nengah lagu ‘Enggai Tundi Dek’ empai lama endang nyadi peransang ngagai iya terus mantaika karya manah ungkup mensia mayuh enggau industri lagu Iban.
“Aku enda nyangka tau bulih anugerah ungkup Album Pemadu Manah/Lagu Ungkup Taun Tu iya nya Enggai Tundi Dek.
“Nyadi tu, udah meri aku peransang ngambika chakah agi nengkebang lagu-lagu ke manah ngagai bala peminat,” ku iya.
Tandu iya, ngagai peminat ti lelenggauka lagu betabuh slow ari iya, sida ulih meda lagu solo pemadu baru ari iya diberi nama ‘Puas Ku Di Tanchum Duri’ ditangkan siti agi lagu ranchak ke diberi nama ‘Anang Ka Bula Dek’ bela ulih dipeda ba Youtube.
Ke penerang, Lucy M nengah lagu enggai tundi dek mujur bulih Anugerah BACA 2024 ba Kategori Album Enggau Lagu Pemadu Manah ke diatur di Kuching, apin lama ke udah.
Naka tu, lagu Enggai Tundi Dek udah mujur dipeda lebih lapan juta penguna media rama kenyau iya dikeluarka kena Mei 2023.-TVS
