PADAWAN, 6 Okt: Gerempung Orang Bumai Nengeri Sarawak (PPNS) enggau Gerempung Orang Bumai Sitak (PPK) dilalau patut chakah agi mantu ngerembaika produk utai tanam raban pekebun di wilayah tu.
Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom madahka, Opis Betanam Betupi ngesan tangkup pengawa ke besai mantu ngerembaika makit produk sechara strategik.
Ku iya nerang, begunan baru PPNS patut diguna enggau manah dikena ngerembai enggau ngeranchakka aktiviti utai tanam ili seraya nagang ulah ngerua produk asil utai tanam.
“Kitai ngasuh orang nanam, atur semua, orang ulih ngatur tang baka ni deka nyual. Nyadi aku ngarap PPNS enggau PPNK berunding baka ni chara ngatur orang bumai bekebun.
“Kitai bisi begunan baru PPNS iya nya sepenyampau RM17 juta diungkupka perintah tang tu patut diguna dikena ngemansutka duit. Kita patut ngulihka duit ari sida,” ku iya.
Iya bejaku munyi nya rambau Pengerami Hari Tebuka Palan Pansik Betanam Betupi Semengok 2024 ditu, kemari.
Kelimpah ari nya, iya meransang deka mayuh agi komuniti datai ngelawa program nya dikena ngulihka mayuh macham pemaik enggau penemu dalam bidang betanam.
Ku iya, nya ulih nyadi ejen peransang sereta pengepun ngagai raban pekebun pengudah mendingka kisah pemujur chara pekebun napi pemar dalam pengawa betanam.-TVS
