BINTULU, 3 Okt: Lebih sejuta batang pengawa baru dipelaba deka dibuka, lalu lebih 600,000 ari penyampau nya ngaul pengereja pengawa landik, setengan pengelandik manggai taun 2030.
Menteri Pelajar, Inovasyen enggau Pemansang Bakat Sarawak (MEITD) Dato’ Sri Roland Sagah Wee Inn madah, penyampau nya bepelasarka pansik ke udah dipejalaika Universiti Malaysia Sarawak (UNIMAS) ba taun 2014.
Ku Roland, pengawa fokus ngagai pelajar TVET chukup beguna dikena nyikap nembiak enggau pengelandik teknologi ke majak ngerembai dikena nangkup peminta gawa ti bepelasarka kereban digital.
“Nitihka pansik UNIMAS ba taun 2014, dipelabaka maya manggai taun 2030, lebih ari sejuta batang pengawa baru deka dibika, ari nya lebih 50 peratus tauka lebih 600, 000 endang pengereja pengawa landik enggau setengan pengelandik.
“Tu kebuah kami chukup bebendar meri peransang ngaul pelajar TVET. Nengah penyikap nembiak enggau pengelandik teknologi baru, kami benung nyikap sida ungkup pengereja pengawa ke majak bepanggai ngagai kereban digital.,” ku iya.
Roland Sagah mansutka jaku nya maya bejadika ‘Mini Seminar On Industry – Academia 2024: Road To TVET Eduction in Digitalisation and Green Technology Industries in Sarawak’ ditu sehari tu tadi.
Ku terang iya, kolaborasyen antara institusyen pelajar baka Sarawak Skills enggau ADTEC Bintulu sereta pemain industri enggau opis perintah mega beguna dikena nentuka kurikulum pelajar seraris enggau guna makit ke maya hari enggau dudi hari.
Ba pengerami nya mega, Roland Sagah madahka Opis Menteri Pelajar, Inovasyen enggau Pemansang Bakat Sarawak (MEITD) deka bejadika sekeda inisiatif dikena ngelaku ke turai pelajar Latih Teknikal enggau Vokasional (TVET), ti numpu ngagai sektor digital enggau teknologi gadung, dalam juluk mata mayuh agi nembiak belajarka bidang nya.
Ku iya, sekeda program TVET enggau pengawa nyungkak pengelandik udah dilanggur dikena ngemujurka inisiatif tu.
Antara nya, nengah kimpin ‘Sarawak Career and Training Fair (ScaT Fair) 2024, Industry Continuous Professional Programme (iCPD) 2024 enggau WorldSkills Malaysia Sarawak’.
“Kami deka bejadika sekeda inisiatif dikena ngelakuka turai pelajar TVET, lebih agi dalam sektor digital enggau teknologi gadung. Tu dikena ngemujurka inisiatif tu, nyadi opis menteri aku udah ngelanggur sekeda program pelajar TVET enggau ngangkatka pengelandik,” ku iya.-TVS
