SARATOK, 3 Okt: Urung tiga minggu agi mensia mayuh tentu bela gagit deka mendingka berita manah bekaul enggau Bajet 2025 ti deka dibantai ba Parlimen.
Nya alai, ba komuniti ti ngemeranka pengawa betanam betupi sida tentu deka nemu nama pelin baru digaga perintah dikena mantu negapka agi industri betanam betupi di menua tu.
Asil tinjau TVS di Saratok, beratika tebal agi bala pekebun enggau penupi jelu chukup ngandalka perintah terus mantu ungkup timpuh panjai ngambika sida enda mantu dalam ngemansangka pengawa nya.
Siku pekebun mit sawit Ating Enteri madah diri endang ngarapka Bajet 2025 perintah malik mih ari sukut pengelantang raban sida (pekebun mit) laban ungkus besawit diatu chukup besai.
“Aku ti nyadi pekebun ngarap dalam Bajet 2025 nasit pekebun deka terus dikemerat perintah lebih agi ari sukut nyaga pengelantang pekebun nya empu.
“Kami ke orang pekebun diatu napi mayuh penanggul lebih agi ari kos ngeluar ungkup asil tani diri empu.
“Kami irau dudi ila rega barang ungkup pengawa betanam baka rachun, sum enggau ke bukai terus niki ti ngujungka kami ngeluarka kos besai ngereja pengawa bekebun tauka ladang,” ku iya.
Udah nya, ba penemu siku penupi manuk enggau itit, Stephen Bansa Baking, iya ngarapka rega jual manuk enggau itit ditiki awak meri untung ke lebih manah ngagai sida ke bedagang.
“Aku ngarapka perintah besai ngaduka semua rega asil kami betanam betupi baka itit enggau manuk.
“Arapka rega manuk enggau itit tu tinggi agi enda ngeruga utai (asil) ke diulih kami betanam betupi, tu ngambika kami di menua pesisir tu bulih penatai pemisi mayuh agi ari ngelama tu enti ari RM1000 ulih angkat agi ngagai RM2000 sebulan,” ku iya.
Bajet 2025 deka dibantai Menteri Besai Datuk Seri Anwar Ibrahim di Parlimen kena 18 oktober tu ti nungkatka pejuluk ‘Ekonomi Madani Negara Makmur, Rakyat Sejahtera’. -TVS
