KUCHING,16 Ogos; Kepala Menteri Sarawak, Datuk Patinggi Abang Johari Tun Openg madah, diatu ukai maya ke patut bepolitik tang ngemeratka pengawa nagang pengekai igi penyakit Covid-19.
Tu laban pekara ke pemadu beguna iya nya bejalaika program betuchuk vaksin dikena nyaga pengelikun rayat.
Perintah nengeri Sarawak ti dipegai Gabungan Parti Sarawak (GPS) entap runding ngemeratka pengelantang rayat nengah mekuhka pengawa meri vaksin dikena nyapai imuniti kelompok.
“Meri puji, Sarawak ngembuan perintah ti tegap ba baruh pegai Gabungan Parti Sarawak (GPS), tang ba renggat perintah besai ngirauka ati ketegal berebutka kuasa enggau penyarut entara parti politik” ku iya maya
Pengerami Ngelancharka Bulan Kebangsaan enggau Kibar Jalur Gemilang 2021 renggat nengeri Sarawak di begunan Kunsil Nengeri (DUN) sehari tu.
Ku iya madah, perintah besai enggau perintah nengeri mesti merintah enggau manah bepelasarka perlembagaan.
“Pekara pemadu beguna iya nya sepenemu entara perintah besai enggau perintah nengeri dalam konteks penumbuh malaysia ti mungkur Semenanjung, Sarawak enggau Sabah,” ku iya.
Ku iya, kaul ti manah ngemudahka Sarawak enggau Sabah ngetanka hak ba baruh Sempekat Malaysia 1963.
Naka ke diatu, Sarawak ulih ngetanka hak ari asil chukai ba produk minyak enggau gis, hak ekuiti dalam Kontrak Perkongsian Pengeluaran (PSC) Petronas enggau hak meri konsesi nyerungkai palan minyak di nengeri tu.
