KUCHING, 30 Sept: Dagang temuai bepelasarka konservasyen jelu mayas tauka orang utan nyadi pematak temuai ari luar lebih agi temuai menua luar enggau domestik ke Palan Jelu Siga Semenggoh ti bepalan urung 24 kilometer ari mengeri Kuching.
Dibuka kenyau taun 1975, Palan Jelu Siga Semengoh tebilang enggau jelu siga baka mayas tauka nama saintifik iya Ponggow Pygmieus.
Ku Warden Palan Jelu Siga Semengoh, Mohammad Azizi Ahmad Zaini, dikategorika nyadi siti ari primat pemadu besai di dunya enggau sepanjai idup diau ba atas pun kayu, mayas tu semina ulih ditemu ba kampung tropika di Kepulauan Borneo Malaysia (Sarawak dan Sabah) enggau Kepulauan Borneo Indonesia (Kalimantan enggau Utara Sumatera).
Palan Jelu Siga Semengoh mega ngetanka habitat jelu mayas dikena nentuka kandang rampa ungkup spesies nya ti nyau deka pupus.
“ Ketegal nya, temuai menua luar berambis duit datai kitu laban deka meda enggau mata kediri empu baka ni gaya mayas tu, pendiau iya, chara begayut ba atas pun kayu.
“Tu laban, kami nemu temuai ti datai ari luar semina deka datai meda palan tu, nya udah baka juluk sida,” ku iya.
Ku iya, Palan Jelu Siga Semengoh nyadi palan nyaga khas ungkup jelu mayas ari aktiviti pemansang seraya dikena mantu nentuka pemeruan jelu siga sereta ekosistem meruan dijaga.
Bekau ari nya, Palan Jelu Siga Semengoh nerima anugerah dagang temuai nyulut dunya 2020 ba baruh kategori program dagang temuai ti meruan.
Ku iya, gaya tu nyata mandangka dunya ngaku pengeransing Sarawak dalam ngintu enggau nyaga rampa menua.
Bisi 67 sitak dijaga penuh TPA udah digazet enggau dijaga ba baruh Sarawak Forestry Corporation SFC enggau kesemua sitak pemesai lebih kurang 2 juta hektar di Sarawak.
Tandu Muhammad Azizi, di Sarawak, 90 peratus populasyen mayas dirikodka ba Taman Negara Batang Ai enggau Santuari Jelu Siga Lanjak-Entimau.
Ku iya, pekara nya meri pengelebih ngagai Batang Ai dikelala nyadi entara destinasyen ekodagang temuai di Sarawak.
“Aku ulih berati sektor dagang temuai kitai lebih ngagai ekodagang temuai enggau adat, nyadi di Batang Ai kitai agi nyaga adat enggau budaya ti nyadi siti pematak bekaul enggau jelu mayas,” ku iya.
Pegawai Pemansik Gerempung Nyaga Jelu Siga WCS Malaysia, Melyen Manggat madahka, WCS nengah kerejasama enggau SFC agi bejalaika pansik populasyen jelu mayas ngelingi Batang Ai Batang Ai-Lanjak Entimau ti dijangka tembu ba ujung 2025.
Pansik nya ku iya, nguna palan habitat mayas nyadika chara dikena nganggar penyampau mayas ba sitak nya.
Iya nambah, kerejasama WCS begulai enggau gerempung tauka pengari komuniti lokal dalam program konservasyen mayas mega sebagi ari pengawa ti deka terus dipejalaika WCS.
Entara aktiviti ke benung dipejalaika WCS ba sitak Batang Ai iya nya pengawa pansik populasyen mayas, program pemereti komuniti enggau sekula sereta woksyop latih ungkup komuniti.
Diatu, bisi empat buah rumah panjai enggau dalam program Ulu Ai Conservasyen Partners Fund LCPF iya nya Menyah Taih, Nanga Jambu, Nanga Sumpa, Pala Taong enggau Nanga Jambu.
“Konservasyen Ulu Ai ba taun 2023 tu tadi udah nerima geran ari WCS Local Conservation Partners Fund (LCPF) dikena bejalaika aktiviti rintis ti nyukung pemeruan jelu siga.
Ambika chunto, ku iya, aktiviti ke udah digaga enggau komuniti nyengkaum ngatur pekit pua kumbu, program nanam pantu ungkup pemakai mayas sereta bantu sekularship Tabung Along.
Iya nerang, program nanam pantu ulih mega nyadi siti puncha pemakai mayas kelimpah nyeliahka jelu nya ngerusakka kebun buah peranak ke besemak.
Ku iya, pengawa tu betuju dikena nentuka tetiap program baka konservasyen mayas mai empas positif ngagai pengelantang komuniti lokal.
Naka diatu, anggar kasar populasyen mayas di selampur Batang Ai- Lanjak Entimau iya nya urung 200 iku.
Kelimpah ari nya, bisi mega habitat mayas ditemu di luar sitak Taman Negara Batang Ai baka di Ulu Sungai Menyang enggau penyampu semua dianggarka dalam 150 ke 200 iku mayas.
Nangkan ke nya, Direktor Eksekutif Borneo Adventure, Robert Basiuk madahka, mayas iya nya siti produk besai ti ulih nyadi pematak dagang temuai ungkup Sarawak.
Iya nerang, ukai semina nyaga pemanah rampa kampung tang nya mega meri pemaik ngagai komuniti menua pesisir nengah peluang kereja ti disediaka dikena nambahka asil penatai pemisi.
“Siti ari penguntung, dagang temuai ti dipejalaika kami di Nanga Sumpa tu, pengani rumah panjai bisi kereja mai temuai ari menua luar baka nyadi malin temuai, deriba bot, pedagang kraf enggau mayuh agi ngambika bisi asil penatai pemisi ti enda ibuh mindah ngagai mengeri besai.
“Tu mih juluk kami serikat Borneo Adventure deka nentuka habitat jelu mayas seruran dijaga enggau chakah bejalaika pengawa nyaga mayas nengah mayuh macam program ke diatur.
Senior Manajer Borneo Adventure, Emong Tinsang madahka, raban iya deka terus nempa kerejasama rat enggau peranak rumah panjai dikena nentuka nadai sapa-sapa ulih ngachau habitat mayas sekalika munuh tauka ngachau sarang mayas.
“Nya kebuah, kami nyendia mayuh jalai kena bedarat masuk ke dalam kampung ngambika ulih ngemuntangka pengawa mai temuai ngiga enggau meda sarang mayas,”ku iya.
Ungkup rekod, 90 peratus populasyen mayas ke bisi di Sarawak dirikodka di Taman Negara Batang Ai enggau Santuari Jelu Siga Lanjak-Entimau.-TVS
