KUCHING, 30 Sept: Tuai Direktor Opis Bomba enggau Penyah Penusah Malaysia, Dato Ts Nor Hisham Mohammad madahka pemisi balai bomba ba sepanjai jalai tebing tasik Sarawak chukup beguna dikena nentuka pengelikun genturung pendiau ba endur nya.
Ku iya madah, dua taba udah disidi alai endur ngaga balai bomba nya, ti sebagi ari penyikap napi penambah pejalai trafik pengudah jalai tebing tasik nya dibuka ila.
“Kitai nemu sepanjai jalai tebing tasik lebuh jematan nya tembu ila lalu trafik mega dijangka nambah, lalu pengawa nyendiaka pala bomba endang siti pekara ke patut.
“Kitai udah ngelala dua taba ke deka dikena kitai ngambi tanah.
“Kitai ngarapka Premier Sarawak berundingka taba ke diperambu tu ngambika kitai ngaga surat ngagai ejensi perintah besai dikena ngemendarka siti tauka kedua-dua taba nya.
“Kitai ngaga balai bomba dikena napi sebarang insiden ke nyadi sepanjai jalai tebing tasik (Coastal Road),” ku iya.
Ngelansa pasal program-program kerejasama enggau bomba, ku iya madah Sarawak megai rikod pemadu tinggi dalam nambahka semangat volunteer ngaul komuniti enda ngira umur.
Nya alai, iya beterima kasih ngagai perintah Sarawak ungkup komitmen enggau sukung ke udah diberi .-TVS
