SARATOK, 28 Sept: Raban orang bumai ba sitak Kunsil Nengeri (DUN) Kalaka ke bedau ngerejister diri dalam sistem e-Tani diperansang lengkas berejister dikena ngemudahka pengawa meri bantu ngagai sida sebedau apun bulan Oktober tu.
Kenu ku Kaban Kunsil Nengeri (ADUN) Kalaka Mohd Duri naka tu, semina 406 iku orang bumai udah ngerejister diri ba E-Tani di pelilih Saratok ke mungkur sitak DUN Kalaka enggau Krian.
Ku terang iya, penyampau nya asil agi mimit nyema dibanding enggau penyampau semua orang bumai ke bisi ba pelilih Saratok diatu.
“Kitai ngarapka penyampau nya majak nambah ngambika semua ulih ngasaika pemaik ari penerang nya awakka semua penyereta ke udah ngerejister e-Tani tu ulih kitai bantu sechara terus.
“Arapka semua penyereta ke bisi ati ulih terus ngerejister laban pengawa rejister dibuka nyentuk bulan Oktober,” ku iya.
Iya madah munyi nya maya dirandau pengudah Program Nanggam Kaul Komuniti Betanam Betupi (AgriCOP) ba Rumah Panjai Rengan Bunyat Selambong, kemari.
Udah nya, ngelansa pasal projek betanam betupi ba DUN Kalaka ke dibaru Ejensi Pemansang Bagi Menua Betong (BDDA) ku iya, bisi 36 peratus tauka RM76 juta ari penyampau semua agih belanja RM200 juta ke diagih ngagai DUN Kalaka endang khas dikena bejalaika projek betanam betupi.
Ku tandu iya, agih RM76 juta nya nyengkaum agih dikena ngaga jalai baru ke Senyawan rembus ke kilang sumil di Pasar Saratok enggau ari Lubok Renit ke Pasar Saratok.
Mohd Duri mega madah sektor betanam betupi deka terus chakah dipejalaika enggau ngemanah baru perengkaguna diempu IADA enggau DID.-TVS
