SRI AMAN, 22 Sept: Kelimpah meri penyedar pasal daya idup bepengerai, pengawa ngatur Hari Tebuka ulih nyadi pantar pemadu manah ngagai raban staf Sepital Sri Aman berandau terus enggau komuniti.
Nengah teks ke dibacha Pemangku Direktor Sepital Sri Aman Dr Sim Poh Ling , dia Sapit Menteri Pelajar, Inovasyen enggau Pemansang Bakat Sarawak Datuk Francis Harden Hollis madah, nengah program baka nya ulih nambahka agi kerejasama antara kededua raban.
“Pengerami Hari Tebuka tu betuju ngedut kaul antara komuniti lokal enggau staf sepital dikena meri penyedar pasal servis ke bisi disediaka ba Sepital Sri Aman.
“Kelimpah ari nya, tu mega peluang dikena meransang daya idup bepengerai sereta nambahka agi pemereti ati pasal pengerai runding ba rayat Sri Aman,” ku iya.
Berebak enggau nya, Harden ke mega Kaban Kunsil Nengeri (ADUN) Simanggang bisi ngelalau mensia mayuh nguna peluang nyerumba program nya dikena ngulihka penerang pemadu baru pasal pengerao tauka bansa servis perubat ke bisi disedika Sepital Sri Aman.
Antara aktiviti ke bisi diatur maya Hari Tebuka tu iya nya beperesa pengerai, meri darah, eksibisyen ari ejensi perintah enggau peribit sereta Fun Run ke dipasuk 500 iku penyereta.
Sama bisi datai Sekretari Politik ngagai Premier Sarawak Datuk Peter Nyomek Nyeap ngarika Kaban Parlimen Sri Aman Dato Doris Sophia Brodie.-TVS
