KUCHING, 7 Ogos; Bisi 15 buah rumah panjai di pelilih menua Julau ngambi bagi dalam Pekit Pemanah Rumah Panjai beserimbai enggau ngerami pengerami Hari Malaysia kena 16 September tu.
Pekit tu diatur Opis Pelilih Menua Julau ke tuju deka mandangka pemanah budaya enggau rampa menua ke bisi di pelilih Julau ngagai menua luar.
Jurujaku pengatur program tu, Boniface Geratong madah, pekit tu mega siti pelasar dikena nerenak pemanah ulah peranak rumah panjai sentang guna tanggungpengawa ba pemansang menua diri empu setipak enggau menua bukai.
“Pekit tu dikira ari gambar ke dianjung baka gambar rumah panjai, ai wong, sistem tagang, aktiviti enggau ke bukai.Tuju tu ngambika pemanah rampa menua Julau dikelala menua bukai ari gambar nya” ku iya.
Iya ngarap rumah panjai ti ngambi bagi ransing besemekih nyadika peransang maya napi pemar ba timpuh pandemik tu enggau ngaul diri dalam aktiviti ke bepengerai ti ulih meri penguntung ngagai sida.
Nangkanka nya, iya mega ngarapka semua peranak rumah panjai ulih beserakup sereta besaup ngintu pemanah rumah ari sukut pemeresi, pengelikun, enggau pemanah rampa menua.
Ku iya madah, pemutus markah sida tu deka diambi ari sukut kreativiti (50 %) enggau kualiti gambar (50 %).
Hari bulan kepenudi nyereta pekit pemanah rumah panjai iya nya kena 31 Oktober tu.
Champion pekit deka mai pulai mata duit RM100,plak besereta setipikit, lumur dua RM750 ,plak enggau setipit, ketiga RM500, plak besereta setipit lalu keempat enggau kelima nerima plak enggau setipikit penyereta.
Penerang ke silik sentang program tau betelefon ngagai pengatur program Philomina Kudang ba lumur (0138349425), Elizabeth (0128756109) enggau Boniface Geratong (01126812039).
