KOTA SAMARAHAN: Pengawa ngaga rumah di nengeri tu patut dikemansang bepelasarka gaya pengidup ti ngenyamaika rayat, kelebih agi sida rebak baru ila.
Kepala Menteri, Datuk Patinggi Abang Johari Tun Openg madahka, rumah ti digaga nya mesti ngambi kira penambah mensia mayuh enggau demografi di Sarawak manggai ba taun 2030 nyentuk ngagai taun 2050 lebuh penyampau orang tuai umur majak nambah di nengeri tu.
“Genturung pendiau nya mesti nyendiaka servis sosial baka palan pengandai orang tuai ngambika orang tuai umur ke diau ba endur nya ulih idup enggau likun sereta bisi sukung ari komuniti ke mendam dia,” ku iya madah.
“Pia mega, endur nya mesti disikap enggau rampa menua ti gadung endur bejalaika aktiviti belelak.”
Dikena nyapai tuju tu, iya madahka perintah Sarawak deka bebendar nambahka penatai pemisi rayat.
“Kitai mesti nambahka penatai pemisi rayat. Entara taun 2019-2030, kitai deka nambahka GDP kitai ari RM130 bilion ngagai lebih RM200 bilion,” ku iya.
Dikena nentuka semua rayat ulih ngasaika pengidup ti bekualiti enggau likun, perintah nengeri deka ngaga rumah ti diempu sida ke kurang penatai pemisi.
Kebuah pia, ku iya madah, enda semua orang ulih meli rumah ti berega lebih RM1 juta.
“Bisi sekeda orang ulih meli rumah berega RM2 juta, lalu sekeda semina ulih meli rumah entara RM150, 000 ngagai RM200,000,” ku Abang Johari agi.
“Nya kebuah, dikena mantu sida ke kurang penatai pemisi, perintah deka ngaga rumah ulih diempu ti disikap enggau infrastruktur baka jalai, parit, utiliti sereta utai bukai ti ditanggung perintah lalu enda mar. Sida semina meli rumah aja.”
Iya bejaku munyi nya lebuh pengawa nyerahka perais Pekit eni Bina Langit ba Menara Hock Seng Lee La Promanade di Kota Samarahan kena Hari Enam.
Pekit nya keterubah diatur Gerempung Arkitek Malaysia (PAM) ba nengeri Sarawak.
