BETONG, 24 Ogos: Kaban Komiti Ruang Bilik Iru ungkup kontinjen-kontinjen ke bisi ngambi bagi ba Lumba Malaysia (SUKMA) Sarawak 2024 berasai temegah laban ulih mantu ngelakuka palan-palan ke manah sereta pemakai asal Sarawak lebih agi di Betong.
Ba penemu Freddy Henry Engga ke ngiru kontinjen Johor, madah diri berasai temegah laban diberi peluang ngelakuka Sarawak tauka menua Betong ngagai kontinjen luar nyerumba SUKMA serak tu.
“Temegah mih laban nyadi siku orang ke dipilih nyadi ditu dikanggau ruang bilik iru ungkup tim Johor, berasai chukup gaga laban ulih ngelakuka Sarawak ngagai orang luar baka Johor lebih agi ungkup menua Betong,” ku iya.
Iya madah munyi nya maya dirandau TVS ba Dewan Sukan Tan Sri Datuk Amar Stephen Kalong Ningkan Betong ke nyadi palan achara angkat berat SUKMA Sarawak ke-21.
Udah nya ba penemu Sonia Kilat, iya ngasaika pekuang gawa nyadi ruang bilik iru ba SUKMA serak tu diguna manah dikena ngelaluka pelilih Betong ngagai raban atlit enggau pegawai ari kontinjen iru ari Kelantan.
“Ya…sida baru datai ditu keterubah iya ke Betong.
“Nya alai, sida endang nadai nemu semua utai baka deka ngiga pengangkut dikena ngiga pemakai ke engkeman.
“Nyadi kami ke nyadi ruang bilik iru kami mih mantu ari segi mantu pasal penerang bekaul enggau utai ke manah ba Betong mih,” ku iya.
Nangkan ke nya, ba penemu Amirul Hidayat Rajali enggau bakih iya Mac Arthur Broker ke diberi tanggungpengawa nyadi ruang bilik iru ngagai kontinjen Pahang madahka, seduai berasai tepantup ati laban juluk deka mai kontinjen Pahang raun ngagai palan ke manah enggau nyepi pemakai asal ba Pelilih Betong udah tejapai.
“Iya ke pemadu besai iya nya pasal pemakai mih tebal agi mayuh endur ke nyamai di Betong.
“Kami mai sida ngagai sekeda endur ke manah lalu kami bisi mai kontinjen tu ngelawa rumah panjai.
“Naka tu nya ke ulih ditunjukka kami lalu siti agi komuniti kitai di Betong chukup manah sukung lebuh betemu enggau orang Pahang nyadi sida terus nanya,” ku iya.
Achara angkat berat ditu tembu lemai kemari lalu ngemataka 13 kontinjen ari selampur menua ngambi bagi ba pekit nya.
Tim Angkat Berat Sarawak serak tu semina bulih tegumpulka siti midul pirak enggau dua midul engkeraju.-TVS
