BINTULU: RM4.9 juta udah diungkupka ngagai Opis Sukarelawan Malaysia (RELA) Sarawak.
Ku Direktor RELA Sarawak Abang Zulfikar Abang Reduan madah, ungkup wang turu nya udah diberi perintah Sarawak kena mayar elawin raban RELA ti bedau dibayar ari bulan April 2021 nyentuk ngagai bulan Jun 2021.
Ku Abang Zulfikar madah, peminta tu bekaul enggau raban RELA ti bejalaika pengawa maya Atur Nagang Pemindah (PKP) di nengeri tu ngelama timpuh tiga bulan nya.
“Elawin raban RELA ke bejalaika pengawa maya PKP berengkah ari 6 Jun suba udah bulih pemendar ari perintah nengeri nengah Komiti Mutarka Penusah Ngenyit Nengeri Sarawak ti deka dibayar ngagai raban RELA,” ku iya.
Elawin nya deka dibayar ngagai 3,000 raban RELA ba serata Sarawak, nyengkaum 347 raban RELA di Bintulu.
Taja pia, senentang elawin raban RELA di Bintulu, iya madah elawin ti dibayar ngagai sida semina ungkup kena bulan Mei enggau bulan Jun aja.
Nangkanka nya, RELA Sarawak mega udah berunding enggau raban pengatur tinggi RELA lalu besetuju deka mayar elawin raban RELA ke gawa sepemanjai timpuh PKP ngena wang turu ti diungkupka perintah besai.
Bejaku senentang isu laun mayar elawin RELA, Abang Zulfikar nerangka RELA Sarawak ngena wang turu ti udah diungkupka kena mayar elawin sida sebedau tu.
Taja pia, sepemanjai timpuh pengelekai igi penyakit COVID-19, penyampau raban RELA ke bejalaika pengawa udah nambah 300 peratus ti ngujungka sida napi penanggul ari sukut belanja enggau wang turu.
Berindik ari nya, perintah Sarawak udah sedia mantu mayar elawin tambah nya.
