KUCHING: Tiga iku orang ke ngidar dadah enggau 25 iku orang ke gian dadah udah ditangkap dalam ‘Op Bersepadu Rempuh Pusher’ ti dipejalaika di Kuching.
Ku Tuai Polis Pelilih Kuching Ashmon Bajah madah, sida ke ditangkap nya beumur entara 18 ngagai 47 taun.
Pansik ngenyit nya dipejalaika ba lapan bengkah endur di Kuching iya nya ba Jalai Stutong, Kampung Siol Kandis, Kampung Lintang, Lorong Stampin Timur enggau Jalai Mancis.
Ba pengawa nangkap nya, lima bansa dadah dirampas, iya nya syabu (37.59 gram), ketamin (6.1 gram), pil ‘ecstasy’ (49 leka) enggau pil Eramin 5 (22 leka).
Semua dadah ti dirampas nya dipelabaka berega RM 25,769.00.
Kelimpah ari dadah, raban polis mega udah ngerampas siti samurai besarung, siti kerambit, sebuah kerita Proton Saga enggau sebuah mutosikal Yamaha Legenda.
Operasyen nya berengkah kena 1 Ogos tu tadi, lalu deka dipejalai nyentuk ngagai 1 September 2021 ulih 5 iku pegawai sereta 32 raban penjaga pengelikun mensia mayuh.
