MUKAH, 14 Ogos: Projek ngaga Waterfront Mukah dipelaba berengkah ba taun baru enggau kos penyampau lebih RM100 juta.
Premier Sarawak Datuk Patinggi Tan Sri Abang Johari Tun Openg madahka projek nya deka diatur sepengudah mansik baru senentang pekara nya tembu.
“Kitai deka ngambi baru kandang endur tebing tasik tu enggau enda ngeruga kandang endur ka bisi lalu tu deka nyadi sebuah kandang endur ti manah,” ku iya.
Iya munyi nya ba aum media sepengudah nemuai ngagai Kampus Laila Taib, Universiti Teknologi Sarawak (UTS) ditu, kemari.
Abang Johari madahka projek ngaga Waterfront Mukah nya deka ngubah rampa mengeri Mukah ngambika manah agi dipeda.
Nerang silik senentang kos, iya madahka ungkup kebendar bagi projek tu iya nya RM100 juta enggau RM60 juta ungkup renggat keterubah sereta RM40 juta ungkup renggat kedua.
Taja pia, Abang Johari nyemetak madahka penyampau tu deka ditambah dikena nampung baru langkar sereta ngemesaika agi kandang endur nya.
“Rampa menua Mukah deka berubah, lebih agi enggau pemisi waterfront tu ti ngaul nyentuk ke Sungai Tellian, sebuah kandang endur ti suah dikena kitai ngatur Pesta Kaul.
“Pesta Kaul ila deka dikemanahka agi enggau pemisi waterfront tu,” ku iya. – TVS
