LAWAS, 13 Ogos: Siku lelaki ditemu bebadi sepengudah labuh ke dalam parit ba kebun di Sg Arur, Long Tuma ditu, sehari tu.
Pengari Opis Bomba enggau Penyah Penusah Malaysia, Sarawak madahka bangkai Ricky Siring, 56 taun, ditemu anak iya urung pukul 7.40 pagi begaring sereta enda nemu orang.
Anak tudah lalu betelefon ngagai bomba ti nerima kangau urung pukul 8.28 pagi.
“Bini tudah minta anak iya ngabas tudah ba kebun laban enti selama tu tudah patut nganjung bini iya nurun gawa.
“Sepengudah datai ba palan nya, raban bomba nanggung tudah ngena juli lalu dibai ke atas, tudah ditetapka midang ari raban perubat Opis Menteri Pengerai,” ku iya nengah siti penerang.
Pengari nya madahka raban iya dipadahka senentang tudah ti ngabas kebun tumu pagi laban ke deka ngembuah.
Sepengudah datai ba alai penusah nya nyadi nengah pati sungai lalu tudah dipelaba telinchir labuh ke dalam anak sungai.
“Tudah mai bakul besai dikena naruh buah lebuh nengah pati sungai nya ke alai deka dibai iya pulai ke rumah,” ku iya. – TVS
