SIBU, 10 Ogos: Lebih 100, 000 iku orang lunggar umur di Sarawak deka ngasaika pemaik ba pengawa nyaga pengerai nengah Skim Pemaik Pengerai Orang Lunggar Umur (SCHB).
Premier Sarawak, Datuk Patinggi Tan Sri Abang Johari Tun Openg madahka skim nya entara bukai deka meri bantu ngagai raban nya dikena ngulihka servis ngubat pengerai pesakit luar.
“Diatu, kitai mesti meresa pengerai enggau suah laban risiko penyakit ke baru.”
“Nya alai, Perintah Sarawak diatu nanggung raban orang lunggar umur dikena ngulihka servis meresa pengerai tu,”ku iya.
Abang Johari mansutka jaku nya maya Pengerami Ngintu Hari Indu Sarawak (HWS) 2024 ditu, sehari tu tadi.
Ku iya nengah skim nya, raban orang lunggar umur ulih ngulihka servis ngubat pengerai pesakit luar ti enda begunaka mata duit ba 168 klinik peribit sekalika 13 sepital peribit panel ba serata Sarawak enggau had maksimum rm500 siku bagi timpuh setaun.
Antara penetap bagi skim SCHB nya, iya nya orang lunggar umur mesti beumur 60 taun ke atas.
Udah nya, sida mesti ngembuan kad pengelala Malaysia bestatus ‘K’, ngembuan penatai pemisi ninting bulan ruang bilik RM7, 000 ke baruh sereta nadai bulih belanja perubat pesakit luar ari sebarang ejensi bukai.-TVS
