SAO PAULO, 10 Ogos: Bisi 61 iku penumpang enggau kru bilun bebadi nyawa pengudah sebuah bilun ke ngundan penumpang terempas di Sao Paulo, Brazil kemari, nitihka ripot Xinhua.
Kompeni penerebai bilun Voepass dalam siti penerang madahka bilun ke terempas ba sitak menua Capela de Vinhedo ngundan 57 iku penumpang enggau empat iku kru.
Bilun nya diripotka dalam pejalai ari mengeri Cascavel, Parana terebai nuju Padang Bilun Antarabansa Guarulhos di Sao Paulo.
Nangkan ke nya, Presiden Brazil Luiz Inacio Lula da Silva mantaika penyinu ati ngagai ruang bilik enggau kaban belayan tudah ke bebadi ba laman rama X. – TVS
