KUCHING, 3 Ogos: Premier Sarawak, Datuk Patinggi Tan Sri Abang Johari Tun Openg ningkah berita ti madahka senentang Kompleks ‘Rumah Putih’ Sarawak ti digaga semak Wisma Pelita, Petra Jaya, nya dikumbai sebuah rumah residen.
Iya madahka, begunan nya ti digaga nguna tempa tukuh pengelikun ke pemadu maju sereta nyadi palan nyimpan data Perintah Sarawak.
“Nya (kebendar) opis ukai rumah endur diau. Iya digaga nguna tempa tukuh pengelikun ke pemadu maju sereta dikena nyimpan data perintah nengeri laban begunan ke diatu iya nya Wisma Bapa Malaysia dibuka ngagai mensia mayuh,” ku iya.
Iya madah munyi nya ngagai pemberita pengudah bejadika Program Nyuaka Menira Ibu Pertiwi ngagai Tuai Kontinjen SUKMA Sarawak ba sebuah hotel tebilang ditu, sehari tu tadi.
Berebak enggau nya, lebuh ditanya senentang ungkus ngaga kompleks nya, Abang Johari madahka pekara nya deka dipadahka ila.
Sebedau tu, bisi sekeda portal berita lokal ngeripotka begunan ke benung digaga ba sepiak Jalai Keliling Datuk Amar Abang Haji Suleiman nya nyadi opis administrasyen ungkup Premier Sarawak.-TVS
