MIRI, 2 Ogos: Semua jaku Iban di Sarawak patut diserariska, Ku Datuk Dr. Penguang Manggil.
Chairman Komiti Pengatur Simposium Jaku Iban Enggau Pengelandik Jari Tikas Sarawak 2024 nya madah iya meda bisi pematut nyerariska jaku IIban ke diguna nitih standard ke sebaka.
“Di bagi menua Miri bisi orang Iban datai ari mayuh menua di Sarawak iya nya Lubok Antu, Betong, Saratok, Ulu Rajang, Kanowit, Limbang enggau ke bukai.
“Nyadi jaku Iban nya bechampur mimit. Tuju kitai ngatur simposium tu iya nya dikena nyeraris enggau ngemetulka jaku Iban nitihka penulin,” ku iya.
Iya mansutka penemu nya rambau bejadika Simposum Jaku Iban Enggau Pengelandik Jari Tikas Sarawak 2024 ditu, pagi tadi.
Iya mega ngarapka nengah simposium nya deka ngangkat enggau ngerembaika agi jaku enggau krafjari Iban ukai semina ba raban orang tuai tang mega ngaul sida ke rebak baru.
Simposium nya mega ulih nyadi pantar alai berandau isu bekaul enggau jaku Iban, ngangkatka penyelai seni budaya bansa Iban, digitalisasyen jaku Iban sereta krafjari Iban.
Dipasuk urung 400 iku penyereta, simposium nya ngangkatka raban tebangkar ba jaku Iban enggau krafjari Iban mantaika enam buah keretas pansik sereta tiga forum bekaul enggau pejuluk nya.-TVS
