SIBU, 23 Julai: Tiga lelaki nyengkaum siku peranak Indonesia ditan dipelaba bisi kaul enggau insiden ngaga penyarut ba taba pasar malam Sibu di Jalai Cross, kemari.
Tuai Polis Pelilih Sibu ACP Zulkipli Suhaili nengah sebengkah penerang sehari tu tadi madahka pengawa nangkap ketetiga lelaki beumur 31 ngagai 35 taun digaga pengudah nerima ripot pasal penusah nya urung pukul 8.46 malam.
Iya madah, pengudah diperesa polis beratika semua saspek nadia ngembuan rikod jenayah lama lalu polis diatu agi nyidi saspek bukai ke agi lepau.
Insiden nya diripotka nyadi lebuh siku orang ke dipelaba mabuk ngachau lalu ngerusak bansal alai bejual ba pasar malam nya.
Ringat enggau ulah nya, sekeda orang terus nyamah saspek lalu ngujungka iya bakal.
Kes dipansik nitihka Seksyen 427/147 Kanun Keseksaan laban ngereja ulah jai ngerusak reta tengkira enggau ngaga penyarut ba palan mensia mayuh.
Mensia mayuh ke bisi penerang pasal insiden tu ulih betelefon ngagai polis ba lumur 084-344111 tauka pegawai pemansik Insp Ahmad Zam Zam Ismail ba lumur 014-9067909. -TVS
