KUCHING, 22 Julai: Enda ngira dini-dini endur, anak Sarawak patut ngingatka haribulan ti besai reti tu – 22 Julai iya nya hari rantau tu dilepaska ari penjajah.
Sapit Premier Sarawak, Datuk Amar Dr Sim Kui Hian madahka, enda ngira endur, rayat Sarawak ulih ngerami Hari Sarawak nengah chara diri empu ti mandangka penyayau ngagai menua Sarawak.
“Nya hari endur kitai berami enggau chara kitai empu. Seruran ingat kitai tu anak Sarawak,” ku iya nengah jaku dirikod beserimbai enggau pengerami Hari Sarawak ti dikeluarka Unit Komunikasyen Perintah Sarawak.
Berebak enggau nya, Pengerami Ngintu Hari Sarawak taun tu ti berambaika jaku “Sarawak Maju Makmur” deka diatur ba Bintulu malam sehari tu ti deka ditaburka terus nengah TVS.
Pengerami ti diatur ba palan Padang Bilun Lama Bintulu deka dirami enggau penatai Tuai Pemegai Menua Sarawak, Tun Pehin Sri Dr Wan Junaidi Tuanku Jaafar enggau bini iya, Toh Puan Fauziah Mohd Sanusi sereta Premier Sarawak, Datuk Patinggi Tan Sri Abang Johari Tun Openg enggau bini iya, Puan Sri Datuk Amar Juma’ani Tun Tuanku Bujang. -TVS
