SARATOK, 20 Julai: Sepenyampau RM4 juta agih belanja udah dikemendar dibaruh Ejensi Pemansang Bagi Menua Betong (BDDA) dikena negapka agi pengawa betanam betupi moden ba sitak Kunsil Nengeri (DUN) Krian.
Kaban Kunsil Nengeri (ADUN) Krian Friday Belik madah, naka tu raban sida benung nusun rintai projek ke deka dipejalaika baka fertigasyen, hidroponik enggau ke bukai.
“Dibaruh sektor betanam betupi moden enggau agropemakai BDDA sereta projek-projek ke ulih kitai kemujur nengah agih belanja RM4 juta nya iya nya kitai deka bejalaika projek baka betanam betupi moden.
“Pengawa tu mungkur fertigasyen, hidroponik enggau mega ngemansangka pengawa betupi sereta betanam ke bukai lalu naka tu kitai benung nusun enggau nerima peminta,”ku iya.
Iya madah munyi nya pengudah Nutup Program Pemansang Modal Mensia (PMI) diatur Opis Betanam Betupi Saratok ba Rumah Panjai Spancer Gon Engkabang Rias Jaya Mapar ditu, ensana.
Ku terang iya, pejalai projek nya ila deka lebih numpu ngagai raban nembiak tauka raban ke baru abis belajar ba palan pelajar tinggi perintah enggau peribit.
Nyadi asil ari pengawa nya ku iya, tentu deka mantu sida ngasilka penatai pemisi diri empu enggau ngurangka kelalu bepanggai ngagai pengawa puang ba sektor perintah tauka peribit.
Ku iya, raban nembiak ba sitak DUN Krian mega patut pintar ngerebut peluang ke udah disediaka perintah lebih agi dalam bidang betanam betupi.-TVS
