KUALA LUMPUR, 20 Julai: Perintah Sarawak deka bebendar nentuka operasyen serikat bilun ke dipenggi Sarawak ulih dikemujur, ku Datuk Patinggi Tan Sri Abang Johari Tun Openg.
Premier Sarawak madahka, tu sepengudah sida nyau majak semak deka nambahka saham ke dipegai ba dalam Affin Bank ke dijangka tembu bulan baru sereta pengawa nyerahka Penyangkai Kapal Bintulu ti udah diserahka ngagai Sarawak pengudah dikemendarka ba Aum Diwan Rayat, Hari Tiga tu tadi.
“Nama udah tu? Airlines (serikat penerebai bilun Sarawak),” ku iya ngagai TVS pengudah meda pengawa Pengerami Nyain Sempekat Pemereti Ati (MoU) Kerejasama Strategik ti ngaul Perintah Sarawak enggau LTAT ba Menara Affin, Tun Razak Exchange (TRX) kemari.
Sebedau tu, Abang Johari madahka serikat penerebai bilun ke dipenggi Sarawak dipelabaka berengkah beoperasyen dalam taun 2025 pengudah proses ambi ngempu serikat penerebai bilun Maswings Sdn Bhd (MASwings) ti sechara prinsip udah disetuju entara Komisyen Penerebai Malaysia, Opis Menteri Pengangkut sereta Malaysia Aviation Group.
Berebak enggau nya, Abang Johari madahka, Sarawak deka terus nyingkang ke mua, mekuhka pemansang ekonomi baru ti majak ranchak di wilayah tu.
Bekaul enggau senentang perambu pemansang Padang Bilun Entarabansa nya, Abang Johari madahka nya dijangka deka digaga dalam taun 2028 pengudah pansik ti bekaul udah tembu.Tandu iya, projek padang bilun nya dianggarka nguna kos penyampau ‘bebilion ringgit’ sereta deka nunda Padang Bilun Entarabansa Hamad, Doha, Qatar.
Ditanya senentang pekara wang Sarawak ke dijangka ba taun 2024, Abang Johari enda nulak peluang penatai pemisi sida ulih ngelui ari RM13 bilion.
Ku Abang Johari, penatai pemisi ke dijapai naka suku ketiga taun 2024 endang meri peransang lalu tagit nya ulih dijapai nyema trend rega minyak dunya mengkang urung USD80 ngagai USD85 setong.
“Naka ke diatu (penatai pemisi) manah lalu iya ulih mujur agi enti dibanding enggau taun 2023. Sarawak agi bisi timpuh enam bulan.”
“Pengarap kitai ngambika terus konsisten,” ku iya. -TVS.
