SARIKEI, 20 Julai: Jalai kebun ke suah ditengah mensia mayuh ba pelilih Pakan patut dikemanah agi dikena meri empas ngagai pemansang sosioekonomi pengani ba sitak nya.
Kaban Kunsil Nengeri (ADUN) Pakan, Tan Sri William Mawan Ikom madah, inisiatif nya ukai semina nyungkak kualiti asil betanam betupi yang mega ulih meri empas besai ngagai rayat ungkup timpuh panjai.
Pia mega ku iya, infrastruktur ke manah mega deka muka mayuh agi peluang ekonomi nyengkaum ngemuntangka pengawa nganjung asil ngagai makit enggau nambahka asil betanam betupi.
“Aku deka nguna sebarang aja belanja ke bisi disedia nyengkaum agih belanja tambah ari opis menteri enggau ejensi betanam betupi bukai dikena nyapai juluk nya. (nyendiaka jalai kebun ke lebih menyana).
“Nyema pengawa tu berupai produktif, nyadi iya ulih muka mata menua bukai, bekaul pemesai guna pemansang reta ke bekaul, anang kita semina ninga polisi perintah, pelin transformasyen perintah tang kurang ngambi bagi laban penanggul besai tu agi bedau teputar.
“Nya alai, aku andal nyapai juluk tu. Aram ngengkah Pakan ba luan,” ku iya.
Iya madah munyi nya ngagai pemberita pengudah nyuaka geran Projek Mit Pemansang Menua Pesisir (MRP) ngagai mayuh gerempung ukai perintah (NGO) ba Opis Pelilih Pakan, kemari.
Ku iya, pemujur sektor nya begunaka strategi manah sereta pengawa sepanjai maya semua raban nyengkaum berubah ari chara lama, ulah bekebun kelimpah penemu nguna teknologi tinggi.
Berebak enggau nya, Mawan madah ejensi ke bekaul patut bejalaika pengawa enggau lebuh regas dikena nentuka sektor nya terus ngerembai sereta mantu nyamin pengelantang pengidup rayat jemah.
Bantu sepenyampau RM200 ribu ringgit nya udah disuaka ngagai 16 NGO dikena sida ngatur aktiviti ke pemaik komuniti.-TVS
