MARUDI, 31 Julai – Projek Ngaga Jalai Marudi Mulu Fasa 1 ti nengah Long Terawan Fasa 1 siti ari Projek Rayat ke dikemendarka Kepala Menteri Datuk Patinggi Abang Johari Tun Openg maya bulan tiga 2019.
Taja pan pia, nitihka ripot ari UKAS, projek sepemanjai 6.8 km ti nguna ungkus lebih kurang RM43 juta nya napi penanggul laun digaga ari timpuh asal ke udah ditetapka.
Kaban Kunsil Nengeri Mulu, Datuk Gerawat Gala madahka, projek nya laun digaga ngeruga perambu asal projek ti minta kunteriktor nembuka jalai nya nitihka hari bulan baru.
“Kunteriktor bisi minta timpuh nya dilanjarka enggau Opis Kereja Raya (JKR) udah besetuju netapka hari bulan baru.
“Projek tu laun digaga ketegal Atur Nagang Pemindah (PKP) enggau penanggul ke bukai,” ku iya madah.
Gerawat ke mega Sapit Speaker Dewan Kunsil Nengeri (DUN) Sarawak nerangka, senentang hari bulan asal projek nya tembu digaga kena bulan semilan 2021 enggau JKR udah netapka hari bulan baru projek tu tembu iya nya kena 7 hari bulan 2 2022.
Iya mansutka jaku nya lebuh dirandau pengarang berita sepengudah ngabas Projek Rayat Fasa 1 Ngaga Jalai Marudi Mulu nengah Long Terawan Fasa 1 ensanus.
Naka ke diatu, peratus fizikal Projek Rayat Ngaga Jalai Marudi Mulu udah tembu manggai 43.95 peratus.
