SARATOK, 17 Julai: Pengelandik pemun baka macha, nulis enggau ngira aja enda chukup dikena napi pemar kemaya hari tu ti udah nuju ngagai Revolusyen Industri 4.0 tauka Pemintar Artifisyel (AI).
Kaban Kunsil Nengeri (ADUN) Krian, Friday Belik madah, beduduk ari nya raban nembiak sekula menua pesisir diatur anang enda nguji nampung pelajar sida ke tikas lebih tinggi, tebal agi dalam bidang Pengelandik Teknikal enggau Vokasional (TVET) sereta Inovasyen Digital.
Jaku Friday nya dibacha Pegawai Palan Servis ADUN Krian James Jimbun Jimbai rambau Program Reruai Project Of Dream Realized (PRO-DR) 2024 Renggat ke-9 diatur ba Diwan Sri Krian, kemari.
“Pengelandik pemun baka macha, nulis enggau ngira udah enda chukup dikena napi pemar dalam dunya ti nuju ngagai Revolusyen Industri 4.0 tauka Pemintar Artifisyel (AI).
“Nya alai, aku ngemeratka nembiak sekula enggau raban nembiak kitai ngambika nampung pelajar sida, tebal agi dalam pelajar Pengelandik Teknikal enggau Vokasional (TVET) tauka Inovasyen Digital ke endang beguna dalam pemansang ekonomi digital ba nengeri kitai tu,”ku iya.
Tandu iya, pemansang bakat dalam bidang Pelajar Sains, Teknologi, Injiniring enggau Matematik (STEM) mega iya nya siti ari bidang ti endang diberi perati Premier Sarawak, Datuk Patinggi Tan Sri Abang Johari Tun Openg dalam agenda iya deka ngubah ekonomi digital di Sarawak.
Ku iya madah, Tuai Raban Bansa Enggau Komuniti (KMKK) mega ngesan tangkup pengawa besai dikena mantu raban TEGAS dalam nyadung penerang ke bekaul ngagai raban nembiak, tebal agi nembiak ti udah ngambi peresa Sijil Pelajaran Malaysia (SPM) sereta Sijil Tinggi Persekolahan Malaysia (STPM) ba menua ti dipegai diri.
Nitihka rikod, kenyau ari taun 2017 nyentuk ke diatu, TEGAS udah mujur nempa lebih kurang 456, 000 modal mensia ti nyengkaum ari nembiak sekula, raban nembiak enggau komuniti nengah promosyen pelajar STEM.-TVS
