SPAOH, 15 Julai: Bukit Sadok ti dikelala sereta tebilang enggau sejarah Bujang Berani Iban kelia, iya nya Rentap dikeandal ulih nyadi pematak penatai temuai ke baru di pelilih Betong.
Sapit Premier Sarawak, Datuk Amar Douglas Uggah Embas madahka, entara komponen besai dikeandal nyadi pematak dagang temuai ti datai ke Bukit Sadok ila iya nya Replika Kubu Rentap.
”Bukit Sadok tu tebilang nama tebilang rita ba kitai menua Sarawak ditu.
“Nya alai, siti projek replika Kubu Rentap deka digaga ba Bukit Sadok din.
“Ari replika ti deka diadu enda lama agi deka ditender.
“Keresa bukai bela deka diengkah ba kubu tu ila iya nya kereban dikena ngayau baka duku, ilang, sangkuh, terabai enggau ke bukai,” ku iya.
Iya ke mega Kaban Kunsil Nengeri (ADUN) Bukit Saban madahka, kelimpah ari Bukit Sadok mayuh agi aktiviti bukai ti ulih narit temuai datai ke pelilih nya baka aktiviti berakit ba Sungai Paku enggau Sungai Layar, Program Tagang sereta Pemanah Rumah Panjai Asal Iban.
Ba awak ke sama, penatai temuai ke pelilih Betong mega meri pemaik ngagai peranak lokal di pelilih Lubok Antu nyengkaum kandang endur ke besemak.-TVS
