KUCHING: Bisi 7.5 tan pemakai udah dianjung ngagai peranak ba enam genturung pendiau di Tabuan Melayu sepengudah ia diletakka ba baruh atur nagang pemindah diteritka (PKPD) kenyau ari 16 Julai suba.
Kaban Parlimen Santubong, Datuk Seri Dr Wan Junaidi Tuanku Jaafar madah, raban Palan Servis Parlimen iya naka ke diatu udah meri bantu 17.5 tan ngagai 2,500 ruang bilik ti ngaul 10,000 peranak ba genturung pendiau nya.
Iya madahka pegawai ba Palan Servis Parlimen iya seruran matau genturung pendiau nya sereta gawa enggau pengari ari genturung pendiau nya dikena ngulih penerang ti baru.
“Pegawai aku ba Kuching seruran matau gaya ba genturung pendiau nya. Kami deka bebendar agi nentuka pemakai sereta utai ti diguna peranak ba endur dia seruran chukup,” ku Wan Junaidi.
Nangkanka nya, enam genturung pendiau di Tabuan Melayu udah bejalaika PKPD iya nya Tabuan Lot, Tabuan Tengah, Tabuan Hilir, Tabuan Dani, Tabuan Cemerlang enggau Tabuan Lama.
Kelimpah ari nya, Wan Junaidi ke mega Menteri Pemansang Pengawa Dagang enggau Koperasi ngelalau mensia mayuh nitihka SOP ti udah ditetapka sereta anang pansut enti nadai kebuah ti berat.
Ku iya madah, taja pan Sarawak udah nyingkang ngagai Fasa Kedua Pelin Mulaika Pemanah Menua (PPN), tu ukai kebuah kitai tau ngambi mudah senentang nyaga pengelikun.
