KUCHING, 6 Julai: Pengudah diaku nyadi nengeri bepenatai pemisi tinggi dua kali bejurut ari bank dunya, pekara ti dikemerat Perintah Sarawak diatu iya nya ngangkatka tikas penatai pemisi ruang bilik genap iku anak Sarawak.
Premier Sarawak, Datuk Patinggi Tan Sri Abang Johari Tun Openg madahka, komitmen nya digaga laban wilayah tu udah ngelui ikas penatai penatai pemisi tinggi 2023 baka ti dibantai Opis Perangkawan Malaysia (DOSM) 2023 kena 2 Julai tu tadi.
“Pekara ke patut diatu iya nya Perintah Sarawak deka terus bekenanas ngangkatka penatai pemisi ruang bilik.
“Kitai deka nambahka penatai pemisi rayat Sarawak di mengeri enggau menua pesisir nyengkaum sektor ti mantu sida ngangkatka penatai pemisi diri empu,” ku iya.
Iya madah munyi nya pengudah betuaika Aum Keenam Supreme Kaunsil Parti Pesaka Bumiputera Bersatu (PBB) Sarawak (6/15), ba Indu Opis PBB di Jalai Bako, sehari tu tadi.
Nangkan ke nya, iya bisi nerangka pasal data pemadu baru dipansutka opis DOSM 2023 kena 2 Julai tu tadi ngayanka Sarawak udah ngelui ari ikas penatai pemisi tinggi 2023 iya nya ngelui 14 ribu US Dollar penatai pemisi menua kasar (GNI) per kapita.
Kena hari empat tu tadi, tuai ekonomi bank dunya ungkup Malaysia, Dr Apurva Singhi nengah laman x madahka, Sarawak udah ngerikodka Penatai Pemisi Menua Kasar (PNK) per kapita iyanya USD 16, 560 sereta ba penuduk keempat entara lima nengeri pemadu tinggi di Malaysia ke udah mujur nyapai status nya.
Taun nyin kemari, Sarawak nempa sejarah pengudah ba keterubah iya diaku bank dunya nyadi nengeri bepenatai pemisi tinggi dalam Malaysia ungkup taun 2023.
Data ungkup taun nya ngayanka Sarawak udah ngelui ikas penatai pemisi tinggi 2022 ti ngelui USD 13,205 penatai pemisi menua kasar (PNK) per kapita.-TVS
