KUCHING, 6 Julai: Tiga midul emas nyadi saran besai tim E-Lumba nengeri ba Pekit Lumba Malaysia (SUKMA) Sarawak 2024 tu ila.
Presiden Gerempung E-Lumba Sarawak (SESA), Afiq Fadhli Narawi madah, saran nya dikena ngemanah agi rikod dijapai tim E-Lumba nengeri ke semina bulih siti midul engkeraju ba Pekit SUKMA 2022 suba.
“Ungkup saran Gerempung Main Elekronik Nengeri Sarawak, ba taun tu ungkup SUKMA. Kami nyaran bulih tiga midul emas.
“Nyadi tu (dikearap) ba achara RaceRoom tauka Racing Simulator. Nya alai ba SUKMA taun tu, bisi bepekitka lima kategor iya nya Game Title, Mobile Legend, PUBG Mobile, Tekken 8, e-Football enggau mega RaceRoom,” ku iya.
Iya madah munyi nya maya dirandau pemberita nyerumba Program Volunteer E-Lumba ba Universiti Teknologi Swinburne Kampus Sarawak (Swinburne Sarawak), pagi tadi.
Tandu Afiq, Program Volunteer E-Lumba ke diatur ba Swinburne Sarawak nya endang pelasar dikena nelebaka raban nembiak lebih agi sida ke benung belajar ba universiti lokal pasal pemisi E-Lumba ba SUKMA Sarawak.
Berebak enggau nya, Afiq nengah pengeransing ngelakuka bidang E-Lumba, Sarawak ulih nempa bakat baru ke nyulut ba renggat dunya dudi hari.-TVS
