SARATAOK, 22 June: Kampung Kaba ba sitak Kunsil Nengeri (DUN) Kalaka udah dipilih nyadi palan alai nirika Kolej Vokasional Betanam Betupi.
Kaban Kunsil Nengeri (ADUN) Kalaka Mohd Duri madah pengawa numbuhka Kolej Vokasional nya chukup beguna ungkup sekeda projek betanam betupi ke bukai ti kala diperambu ba Kampung Kaba sebedau tu baka ngaga kilang beras ba baruh Ejensi Pemansang Bagi Menua Betong (BDDA).
“Tu senutuk enggau dalam BDDA kitai merambu deka ngaga kilang beras enggau ngemanah infrastruktur beungkus RM3.5 juta.
“Kedua, iya nya kitai bisi Projek I-CATS Agro Pemakai lalu ba Kampung Kaba mega bisi Projek RISDA ungkup nupi manuk enggau itit lalu tu penteba ti dipilih Opis Pelajar Pelilih Saratok ke deka nitika sebuah Kolej Vokasional Betanam Betupi ba Kaba,”k iya.
Mohd Duri madah munyi nya maya Pengerami Ngintu Hari Raya Aidiladha 2024 diatur Komiti Pemansang enggau Pengelikun Genturung Pendiau (JKKK) Kampung Kaba enggau Komiti Pengatur (JKP) Masjid Cahaya Islam Kampung Kaba, empai lama.
Ku tandu iya, pengawa ngaga kolej nya engkeman laban ba sitak nya udah bisi Skim Nanam Nanas, Jagung enggau Nyiur ba baruh atur Kaunsil Pemansang Pekebun Mit Pedagang Getah (RISDA) enggau Kaunsil Pemansang Betanam Betupi Besepadu Kandang Endur (IADA).
Kelimpah ari nya, Kampung Kaba mega udah dipilih nyadi kandang alai Kolej Universiti i-CATS bejalaika Projek Agro Pemakai.-TVS
