KUCHING, 10 June: Perintah Sarawak, nengah Opis Menteri Kuasa enggau Pemeruan Rampa Menua, udah bulih geran pansik besai ari Opis Menteri Ekonomi enggau Pekara Wang Korea Selatan.
Premier Sarawak Datuk Patinggi Tan Sri Abang Johari Tun Openg, maya mantaika pekara nya madah geran nya deka dikena ngemansangka Pelin Kuing Tuju Hidrogen Sarawak.
“Geran tu deka ngujungka kitai ulih mungkal pansik dikena ngemansangka siti pelin penuh ke pemaik besai kuasa hidrogen di nengeri tu,” ku iya.
Iya madah munyi nya maya bejaku mungkal Pengawa Bejadika Aum Besai enggau Eksibisyen Hidrogen Gadung Asia Pasifik 2024 (APGH 2024) ba Palan Konvensyen Borneo Kuching, ditu, pagi tadi.
Lebuh beratika pemesai guna kerejasama strategik antara Sarawak enggau Korea Selatan, Abang Johari madah nya deka meransang bala tuai di Sarawak ngemeranka ekonomi hidrogen nengah nyerungkai strategi inovatif pemansut enggau nguna hidrogen.
“Kerejasama tu dipelaba deka meri penguntung besai, nyengkaum pemansang ekonomi, nyendiaka peluang gawa. Sereta ngaul atur nyaga rampa menua, senutuk enggau juluk besai pemeruan dunya,” ku iya.
Pansik nya daka nyaran ngagai sekeda bidang besai, nyengkaum pemansang teknologi pemadu baru dalam pemansut hidrogen, pemansang infrastruktur, enggau penumbuh langkar pengawa ti deka nyukung industri hidrogen.
Berebak enggau nya, Abang Johari madah berita nya mandangka komitmen Sarawak dalam nempa kerejasama enggau bakih kunsi dunya dalam meransang inisiatif ubah kuasa engau nyapai juluk klimet.
“Kerejasama tu mega ngemuntangka pengawa mindahka teknologi enggau penukar juluk, awakka Sarawak nguna bala tuai belandikka bidang tu enggau terus nyukung ngemansangka kapasiti enggau inovasyen lokal dalam ngemansangka ekonomi hidrogen,” ku iya.-TVS
