BETONG, 29 Mei: Komiti Kereja Sektor Pemansang Rama enggau Pekara Indu Ejensi Pemansang Bagi Menua Betong (BDDA) nyaran semua projek dibaruh kemata sida deka berengkah ujung taun tu.
Chairman komiti nya, Datuk Mohd Razi Sitam madah naka tu semua 45 buah projek ke diperambu dibaruh komiti nya agi dalam bemacham renggat atur pengawa.
“Aum serak tu kitai berandauka 45 projek dibaruh Komiti Kereja Sektor Rama ke dikuasa BDDA ngaul ejensi-ejensi ke udah dipadu bejalaika projek tu.
“Kitai nyaran ulih dikemujur berengkah ujung taun tu tauka pun siku ketiga taun tu semua projek ke udah diperambu dibaruh BDDA ulih dipejalaika magang,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah betuaika Aum Kereja Sektor Pemansang Rama enggau Pekara Indu BDDA ba Bilik Aum Kenyalang di Kompleks Perintah Nengeri ditu, empai lama.
Ku iya, bisi mega sebagi ari projek ke digaga nengah ‘in house’ nengah ejensi-ejensi pengereja pengawa ke dipadu baka Opis Kereja Raya (JKR), Kaunsil Pelilih, Opis Parit enggau Entali Ai (JPS) mega udah masuk tinda.
Tandu iya, raban Sekretari Pekara Wang Nengeri Sarawak (SFS), Raban Bekuasa Perambu Sarawak (SPA) enggau BDDA ke nyadi Sekretariat dipinta ngelengkaska atur nyiri perunding projek ngambika pengawa nya bejalai enggau lanchar.-TVS
