MIRI, 29 Mei: Urung 46 pengani ari 14 ruang bilik tebunsa pengudah rumah panjai sida dituntung penusah angus ba Kampung Long Bangan Apoh, Baram kemari.
Tuai Balai Bomba enggau Penyah Penusah (BBP) Marudi, PPgB Maureen Sim madah, penusah angus nya dipelaba nyadi urung pukul 5 pagi.
Nengah sebengkah penerang media seraban tiga iku bomba bekejang ngesah pukul 9.05 pagi lalu datai pukul 3.04 lemai.
Bisi penanggul ngenataika diri ngagai rumah panjai nya ketegal kelalu jauh iya nya urung 248 Kilometer ari balai nengah jalai batang.
Jalai mega balat debu, lichau ketegal ujan kelimpah nadai arus telekomunikasyen ba palan penusah nyadi.
Seninjik datai ba rumah panjai nya, bisi 14 pintu ari 102 pintu rumah nyengkaum sebuah kerita pikap Hilux enggau motosikal Honda udah angus lengis.
Pengani rumah panjai nya empu bisi nguji ngerara api ngena ai ba kandang rumah nya lalu ulih rara sida ari terus nyerarai ngagai rumah bukai.
Semua sida ke angus rumah mujur nyelamatka diri lalu raban bomba udah ngambi penerang sida ke tebunsa angus rumah ngambika dibantu.
Kebuah penusah nyadi enggau penyampau pengerugi agi dipansik, pengudah pengawa tembu raban bomba mupuk pulai urung pukul 4.35 lemai.-TVS
