KUCHING, 23 Julai – Agih belanja sepenyampau RM36 bilion ungkup pemansang infrastrakcha ba baruh Langgur Malaysia Lumpar KE-12 (RMK-12) iya nya kenyau ari taun 2020 nyentuk ke 2025 ti dikemendarka perintah Gabungan Parti Sarawak (GPS) endang patut.
Sapit Kepala Menteri Tan Sri Dr James Jemut Masing nyemetak madahka, isu penyeranta di nengeri tu semina ulih diputarka nengah pemansang infrastrakcha tebal agi di kandang menua pesisir.
“Sarawak terus ngemansangka infrastrakcha sereta nyendiaka akses ba semua pelilih di serata nengeri tu. Enti sema pekara tu enda dipejalaika kitai enda ulih mutarka isu penyeranta di nengeri tu,” ku iya madah ba dalam siti penerang maya hari empat.
Masing ke mega Menteri Pemansang Infrastrakcha enggau Pemansang Kapal madahka, ambika chunto menua China iya nya menua ti bisi chara ke engkeman dikena mutarka penyeranta ti nyerangkung penyeranta ba menua pesisir.
“China iya nya menua chunto ti bisi chara dikena mutarka isu penyeranta ti nyengkaum kandang menua pesisir. Sida ngungkupka bebilion dikena ngemansangka infrastrakcha di serata menua.” ku Masing madah.
Berindik ari nya, iya madahka China diatu udah nyadi menua kedua pemadu kaya di dunya ari menua ti napi penyeranta ba taun 1950-an kelia.
Maya Ngelancharka Strategi Pemansang Pasca COVID-19, Kepala Menteri Datuk Patinggi Abang Johari Tun Openg madahka, dalam timpuh lima taun ti deka datai, Sarawak besedia deka nyadi entara nengeri pemadu maju tebal agi enti sema pemansang infrastrakcha baka jalai tebing tasik, jalai besai kedua, jematan sereta Jalai Besai Pan Borneo udah tembu.
Iya mega nerangka senentang perintah GPS ti dituaika Kepala Menteri Abang Johari udah bejalaika sekeda singkang ke betul dikena mutarka isu penyeranta di Sarawak.
“Rayat Sarawak mesti nemu ubah ti semina deka berubah aja ukai pekara ke pemadu manah ungkup pemansang nengeri tu,” ku iya madah agi
