KUCHING, 27 Mei: Pengawa ngatur Bazar Gawai Dayak 2024 udah nyapai asil jual sepenyampau RM1.98 juta pengelama 10 hari diatur di MJC Batu Kawah ditu.
Sapit Menteri Perengka Pengangkut (Langit Enggau Jalai) Datuk Dr Jerip Susil madahka, rikod nya udah ngelui asil jual di Bazar Gawai Dayak ke sebedau tu bepalan ba Diwan Komuniti Kaunsil Mengeri Kuching Selatan (MBKS).
“Kluster pengawa dagang nya ngaul 180 reruai nyual produk pemakai engau ai irup, krafjari, servis nyengkaum bejait, nyual produk penganta baka manik naka 10 hari udah diatur iya nya ngelui rikod asil jual Bazar Gawai Dayak sebedau tu.
“Tu rikod pemadu tinggi kala dirikodka.
“Tabi puji ngagai pedagang enggau Opis Betanam Betupi Sarawak ke nyadi komiti ngatur reruai endur jual,” ku iya.
Iya bejaku munyi nya rambau pengawa nangguh Bazar Gawai Dayak 2024 di MJC Batu Kawah, malam tadi.
Bazar Gawai Dayak 2024 udah ngerintaika tiga kluster ngatur ke mekuhka ngagai sukut dagang, seni pemerindang sereta lumba enggau main.
Ba awakka sama iya ngarapka pengawa ngatur Bazar Gawai Dayak taun siti nyin ila deka lebih richah enggau deka nerima mayuh agi temuai.
Jerip madahka udah tu ila raban komuniti Orang Ulu deka nyadi tuai rumah ngatur Gawai Dayak Renggat Negeri Sarawak 2025.-TVS
