KUCHING, 22 Julai: 22 Julai 1963 iya nya Hari ti chukup besai reti ngagai rayat Sarawak.
Nama kebendar reti sehari tu enggau Hari Sarawak kena 22 Julai 1963?
Mayuh orang saru penemu sentang Hari Sarawak ti madahka ‘Kemerdekaan’ tang ba rayat Sarawak hari bulan nya nandaka Sarawak udah diberi kuasa megai perintah kediri empu.
Siku tebangkar sejarah sentang hari Sarawak, Sidi Munan madahka siti penyilap kitai mikir 22 hari bulan tujuh hari merdeka laban maya nya Sarawak keterubah ngatur pengawa bepilih megai perintah kediri.
“Hari tu patut dirami, tau begawai kitai. Nama kebuah? Laban nya keterubah diberi perintah queen megai kediri empu, ukai merdeka, ‘Self Rule, Self Government’. Nama kebuah diberi laban kitai bisi election (pengawa bepilih).”
Ku iya madah, Sarawak kena 22 julai 1963 agi dipegai Britain nyentuk ke Sarawak sama enggau numbuhka Malaysia kena 16 September 1963.
“Nyadi pengawa bepilih lalu diatur. Nya kebuah kitai bisi kepala menteri ti keterubah iya nya Kalong nyadi kepala menteri kena 22 Julai 1963” ku iya.
Nya kebuah, kitai patut ngintu Hari Sarawak enggau penuh ati ngambika mereti sentang sejarah nya enggau nenerak sayauka menua diri seraya nyingkang ke mua nyadi nengeri ti maju, tegap serata likun.
Intu Hari Sarawak enggau berami sereta mantaika pengelandik anak Sarawak ngagai mata dunya
