KUCHING: Perintah Nengeri Sarawak mai mayuh ubah dalam ekonomi, komuniti, infrastruktur enggau politik, pengudah ia diberi kuasa merintah menua tu kediri empu kena 22 Julai 1963.
Sapit Kepala Menteri Sarawak Datuk Amar Douglas Uggah Embas madah, rayat ke ada sebedau taun 1963 kala meda pendiau menua Sarawak maya nya ti jauh tinggal enti dibandingka enggau pendiau diatu.
“22 Julai endang hari bulan ti besejarah lalu patut ditemu ulih tiap iku peranak Sarawak, ke lebih agi pekara ti nyadi nyentukka Sarawak diberi kuasa merintah diri lebuh maya nya,” ku iya.
Nengah pengerami Hari Sarawak, tambah Uggah, rayat deka nemu agi pasal sejarah enggau penusah ti ditapi bala tuai raban bansa maya sida belabuh merintah diri.
Sida bebendar nempa pemereti ati enggau penyerakup semua bansa sereta nentuka penegap ekonomi enggau politik ba Nengeri Sarawak.
Uggah mega mai rayat Sarawak meruan beserakup sereta sama-sama gawa ngambika Sarawak nyadi menua ti mujur sereta nyapai juluk menua maju manggai taun 2030.
Pengerami Hari Sarawak taun tu disambut enggau jelan pemesai baka taun suba laban Sarawak agi napi penusah ketegal pandemik COVID-19.
