BETONG, 21 Mei: Semangat pengeransing orang tuai kelia ti bekenanas ngidupka diri baka bumai padi sampai penuh tibang baru tepantup ati patut ditunda sereta nyadika peransang.
Sapit Premier Sarawak Datuk Amar Douglas Uggah Embas madah pemedis ke kala diasai orang kelia patut diperati raban ke rebak baru.
Diatu mayuh penyamai ke diasai enda tinggal ketegal bisi bantu ari perintah, taja pia semua pemujur nya dijapai endang asil ari pengeransing diri empu ke bebendar gawa sereta enggai alah ari orang bukai.
“Diatu kitai nyau deka ngintu Gawai Dayak 2024.
“Aram kitai merening ke belakang enda lama baka ni orang kelia ke mujur bulih padi disimpan ba tibang sadau nya baru sida tepantup ati dalam ngapuska taun.
“Nya alai, penegar pengeransing sida ke tuai kelia ngulihka utai edang enggai alah ari pangan diri,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Pengawa Nyerahka Chek Projek Mit Menua Pesisir (MRP) ngagai 188 Komiti Pemansang enggau Pengelikun Genturung Pendiau (JKKK) enggau Biro Indu di DUN Bukit Saban, ensana.
Ku tandu iya, deka nyadi orang ke mujur kemaya hari tu ukai pekara ke senang laban begunaka pengeliat ati enggau mesti nakal napi pemedis.
Berebak enggau nya, Uggah madah diri berasai tegemah meda mayuh pemujur ke mayuh dijapai pengani ba DUN Bukit Saban enti dibanding enggau kelia.
Ba pengerami nya, urung RM1 juta agih MRP ari iya empu enggau Kaban Parlimen Betong Dr Richard Rapu udah diserah ngagai JKKK enggau Biro Indu ari 94 buah rumah panjai di Bukit Saban.-TVS
