BANGKOK, 17 Mei: Sarawak terus entap enggau pengeransing deka nyapai juluk ‘102030’ iya nya siti kelai saran Sarawak deka ngasilka kapasiti kuasa 10 gigawatt manggai taun 2030.
Premier Sarawak, Datuk Patinggi Abang Johari Tun Openg madah, nya endang chara mudah meri pemereti ati ngagai rayat pasal visyen Sarawak ungkup pemeruan dudi hari.
“Pengawa ngasilka kuasa 10 gigawatt sebagi ari nya deka diulih ari penatai kuasa ulih dikemaru baka kuasa hidro, solar, turbin gas enggau kuasa biojisim,” ku iya maya bejaku ba Aum Besai Pendiau Dudi Hari Kuasa Asia 2024 ditu, pagi tadi.
Ku terang iya, Sarawak meri pemerat ngagai pemeranak puku dalam kuasa ulih dikemaru, lebih agi ba kuasa hidro dalam ngerandang pengerembai nengeri ti ngerintaika tiga taga visyen besai ungkup sektor kuasa nya.
“Ba taun 2016, Sarawak bejalaika atur keterubah dalam ngiring Grid Kuasa Trans Borneo nengah adan menua Sarawak enggau Kalimantan Barat Indonesia.
“Kelimpah ari nya, Sarawak mega deka terus nempa kaul enggau menua sepiak iya nya Indonesia, ngemansangka Projek Hidroelektrik Mentarang Induk tauka MIHEP di Kalimantan Utara nengah kerejasama enggau bakih kunsi strategik di Indonesia,” ku iya.
Udah nya, ku Abang Johari madah Sarawak deka terus ransing ngintu pemeruan rampa menua Borneo laban nengeri tu endang regas mantu ngatur inisiatif Grid Kuasa ASEAN. -TVS
