Beserimbai enggau Hari Pengajar serak tu, TVS bisi ngerandau siku pengajar ari Sekula Sekondari (SMK) St Augustine Betong, Resa Billie.
Ku Resa, lebuh ngenang pasal nguna kereban teknologi sekumbang nyadi pengajar pemar ti udah diasaika iya maya ngajar ba menua pesisir iya nya pedis bulih arus internet ke menyana.
Ku iya, dalam juluk perintah enggau Opis Menteri Pelajar Malaysia (KPM) ngangkatka Teknologi Digital dalam dunya pelajar di menua tu, bala pengajar di menua pesisir betapi enggau penanggul bungkur internet ke enda berapa manah dikena ngajar bala nembiak.
“Siti ari nya sukut bekaul enggau takah digital iya nya lebuh kitai berati bisi sekeda sitak dia bungkur internet chukup pedis digiga.
“Lebuh kitai ngenang pasal japai bungkur digital tu nyadi nama pekara ke nyadi enda semua bala nembiak kitai ulih ngasaika pemaik ari pemisi kereban teknologi kemaya hari tu,” ku iya.
Tandu iya, pekara tu nyata dipeda maya maya menua betapi enggau pengerekai pandemik Covid-19 lalu ngujungka bala pengajar di menua pesisir chukup pedis bejalaika tanggungpengawa diri.
“Tu ulih dipeda lebih agi maya pandemik Covid-19 nuntung menua tu.
“Berengkah ari nya mih kitai meda bungkur internet kitai tu ngujungka kami gawa 360 darjah (kiruh) dikena nentuka nembiak ba menua pesisir tu enda tinggal dibanding enggau sida ba mengeri.
“Nyadi tu antara nama utai ti deka dipinta kami adu awakka kitai ulih ngerapit agi (takah digital) enggau nembiak (sereta awak sida) ulih ngasaika pemaik ari pekara-pekara ke udah disebut aku ba pun tadi,” ku iya.
Pengajar Resa Billie pas Bachelor Degree Sains Lumba (Kepujian) ari Universiti Teknoloigi Mara (UITM) Shah Alam.
Udah ngepunka pengawa iya nyadi pengajar taun 2006.
Iya terubah dianjung gawa ba SMK Three River Mukah nyentuk taun 2012 sebedau pindah gawa ba SMK Paku, Bau ari taun 2013 nyentuk 2017.
Antara ex-nembiak kala diajar iya Kaban Kunsil Nengeri (ADUN) Tellian Royston Valentine.
Kelimpah ari nya, Pengajar Resa Bilie mega antara orang ke mayuh mantu pemansang main bol Sarawak iya nya mujur nempa urung 20 iku pemain.
Tebal agi pemain bol ke kala dilatih iya kala bemain ba tim baruh 22 taun menua enggau nengeri. Pia mega sekeda ari sida nya agi regas bemain enggau kelab sereta tim lokal iya nya Kuching City FC, Tim Soldadu Malaysia (ATM) enggau Polis Diraja Malysia (PDRM)
Antara pemain nya Muhd Faris Faidillah, Aquilla Rahman, Allan Lagang, Gibson Billy, Steve Selutan enggau ke bukai.-TVS
