SARATOK, 16 Mei: Kaban Kunsil Nengeri (ADUN) Krian Friday Belik ngelalau semua Tuai Tuai Rumah enggau Tuai Raban Bansa (KMKK) lebih agi ba sitak Kunsil Nengeri (DUN) Krian patut lebih regas nyidi nembiak redak sida ke patut dibantu.
Ku iya, pekara tu chukup beguna dikena nentuka nadai kes baka kala dikerembai ba media rama ngaul siku lelaki ke udah lunggar umur idup nupi diri ba sebuah langkau kebun ke nyau repuk di menua Meruji Kabo, Saratok.
“Aku pan enda ga ulih mansik nyidi siku-siku orang ke bisi begunaka bantu enggau tulung.
“Nya alai, aku begunaka saup bala Tuai Rumah, bala Kaunselor enti bisi tetemuka kes ke baka tu ngarapka kita nya ulih madah ngagai Palan Servis (DUN Krian) tauka ngagai aku empu.
“Kitai enggai pekara nya disadung kiba kanan baka ke udah lalu ngujungka salah peragam.
“Arapka bala Tuai Rumah bejalaika pengawa diri enggau lebih regas agi nyidi sida ke patut dibantu baka tudah Renang,” ku iya.
Friday madah munyi nya lebuh meri timbal ngagai pengari TVS bekaul enggau kes siku orang lunggar umur iya nya Renang Saying ke udah dikerembai ba media rama Facebook, empai lama.
Berita ke dikerembai nya nerima bemacham timbal ari mensia mayuh.
Nya alai, Friday meri terima kasih ngagai raban ke udah mantaika berita pasal penusah ke ditapi orang tuai nya lalu ngujungka raban bekaul datai ngesah dikena nentuka tudah ulih dibantu nitihka pematut.-TVS
